Се шушка, се прикажува, дека Козаците доаѓаат!
март 11, 2010Козаците стануваат дел од Руската Армија
Руските козаци повторно ќе се занимаваат со работите, како и нивните дедовци, па многумина ќе бидат ангажирани за чување на државната граница. По многу години козаците од федералните власти добија дефиниран статус. Освен што на своите прослави ќе може да ги облекуваат свечените униформи и да носат сабји, тие од властите ќе добијат конкретни задачи и за тоа ќе добиваат плата. Козаците во иднина ќе се занимаваат со заштита на шумите, историските и културните споменици, а освен тоа ќе бидат ангажирани и во ликвидирање на последиците од природните непогоди, како и во чување на редот.
Поради намалениот број војници, руската армија ќе брои околу милион, долгата граница ќе биде тешко да се чува без оглед што ќе се купи современа техника за деноноќно следење. Затоа е одлучено да се ангажираат козаците кои, како и нивните дедовци, ќе ја чуваат државната граница. Освен тоа, тие ќе учествуваат и во борбите против тероризмот.
Во овој момент за чување на границата се ангажирани повеќе од 16,5 илјади козаци во 1.400 народни дружини. “Во Ростовската област сега се формираат заеднички екипи на пожарникари во кои, покрај професионалци, ќе има и козаци. Токму козаците ќе ја преземат обврската да ги надгледуваат старечките домови во кои во последниве неколку години често се случуваат пожари”, вели началникот на штабот на донските козаци, Виктор Могилњи. Тој додава дека за одржување на јавниот ред во Ростовската област дневно се ангажираат повеќе од 1.300 козаци. Тие за обиколка на теренот користат коњи.
Во многу градови досега козаците не добиваа никаков паричен надоместок за својата работа. Но, во некои области властите ги наградуваа козаците. “Кај нас во Ростовската област козакот што патролира со коњ месечно добива околу 7.000 рубли (170 евра), а пешакот добива 4.200 рубли”, вели атамот на донската козачка војска, Виктор Водолачки, кој воедно е член и на рускиот парламент. Јасно е дека од тие пари козаците не можат да живеат, туку се занимаваат и со земјоделство.
Советот при претседателот на Руската Федерација за прашањето на козаците, кон крајот на февруари разговараше за тоа на кои работи може и треба да се ангажираат козаците. Со указ од претседателот Дмитриј Медведев е прецизирано каква облека и палта треба да носат козаците. Секојдневната облека што ќе ја носат козаците ќе биде многу слична на војничката. Меѓутоа, на свеченостите козаците ќе ги облекуваат своите стари униформи.
Козачката униформа ќе имаат право да ја носат само оние што се регистрирани и членови на здруженија. На тој начин ќе се доведат во ред и козачките единици. Досега се случуваше поради козачките самонаречени атамани многу козаци се доживуваа како безделници што мавтаат со сабјите и се китат со ордени. Еден број “непослушни атамани” се спротивставуваат на тоа козаците секојдневно да носат униформа што е слична на војничката. Таквите атамани сметаат дека тоа е уривање на древната традиција и сакаат да облекуваат униформи какви што носеле нивните дедовци.
Најновата идеја на Кремљ козаците да се ангажираат за корисни работи би можело да биде повеќекратно корисна, а козаците би имале и поголема материјална корист. На оние на кои повеќе им одговара да не постои цврста дисциплина и натаму ќе настојуваат да го задржат својот досегашен статус. Меѓутоа, сигурно е дека властите нема да дозволат козаците да работат што сакаат и понекогаш да се однесуваат како друмски разбојници.
Сенаторот од американската сојузна држава Калифорнија Рој Ешбурн, кој е познат по хомофобското дејствување во својата кариера и острата борба против правата на хомосексуалците, откако бил уапсен пијан признал дека всушност и самиот е геј.
